БзэшIэныгъэм иотдел иIофышIэхэм Мыекъопэ индустриальнэ техникумым Iэнэ хъурае щашIыгъ

Ныдэлъфыбзэм имазэ къыхиубытэу гъэтхапэм и 20-м 2018-рэ илъэсым Гуманитар ушэтынхэмкIэ адыгэ республикэ институтым бзэшIэныгъэм иотдел иIофышIэхэм адыгабзэмрэ тхыбзэмрэ я Мафэ фэгъэхьыгъэ Iэнэ хъурае Мыекъопэ индустриальнэ техникумым щашIыгъ. Техникумым идиректорэу ЛIыунэе Мурат адыгабзэм иухъумэнкIэ, ар студентхэм ягъэшIэгъэнымкIэ Iофыгъоу техникумым щагъэцакIэхэрэм къатегущыIагъ. Ащ ыуж Гъыщ Нуриет ыгъэхьазырыгъэ мэфэкI къэгъэлъэгъоныр къыригъэжьагъ, студентхэм усэхэр, орэдхэр адыгабзэкIэ къаIуагъэх, къэшъо дахэхэр къагъэлъэгъуагъэх, зэрэдунае зигъэхъагъэ зэлъашIэрэ адыгэ бзылъфыгъэхэм афэгъэхьыгъэ сценкэхэр, презентацие гъэшIэгъонхэр къашIыгъэх. ШIэныгъэлэжьхэр техникумым къызэрэкIуагъэхэр лъэшэу зэрягуапэр къаIуагъ. Тэу Нуриетт, институтым ишIэныгъэ секретарь, шIуфэс гущыIэ къышIыгъ ыкIи шIухьафтынэу томищ хъурэ «Адыгабзэм изэхэф гущыIалъэ» бзэшIэныгъэ отделым ыцIэкIэ афигъэшъошагъ. 



Ащ ыуж Iэнэ хъураер филологие шIэныгъэхэмкIэ докторэу Гъыщ Нухьэ идокладкIэ къызэIуихыгъ. Филологие шIэныгъэхэмкIэ кандидатхэу Анцокъо Сурэт, Ситымэ Сар, Тэу Нуриетт, Биданэкъо Марзият, Атэжьахьэ Сайхьат, Тыгъужъ Гощсым ядокладхэри къашIыгъэх. Ащ къыкIэлъыкIуагъэх техникумым икIэлэегъаджэхэм ядокладхэр. Ахэр: Гъыщ Нуриет, Брагунэ Асият, Оркъэжьэкъо Елен, Сапый Эллеонор, Къоджэшъэо Рим, Къат Марин ыкIи нэмыкIхэри.
Докладхэм ауж упчIэу къэтэджыгъэхэм яджэуапхэр къаратыжьыгъэх. Адыгабзэм иегъэджэнкIэ къиныгъоу зыIукIэхэрэр къаIуагъэх. Ахэм язэшIохынкIэ институтым иIофышIэхэр IэпыIэгъу зэрафэхъун алъэкIыщтхэм арыгущыIагъэх.



Адыгабзэр адыгэ хабзэм, адыгэ зекIуакIэм, адыгэ шэным къыщежьэ. Студентхэу янэ-ятэхэм акIэрычыгъэхэр адыгэ хабзэм, шэн-зекIуакIэхэм тетэу псэунхэмкIэ техникумым иIофышIэхэр, идиректор лъэшэу зэрэдэлажьэхэрэр къыхэщы. Ащ лъэшэу тигъэгушхуагъ!
Iэнэ хъураем изэхэщэн дэлэжьагъэх бзэшIэныгъэм иотдел иIофышIэ шъхьаIэу Тыгъужъ Гощсымэрэ техникумым адыгабзэмкIэ икIэлэегъаджэу Гъыщ Нуриетрэ.

Анцокъо Сурэт, бзэшIэныгъэм иотдел ипащскачать dle 11.3